Xbox-dan ayrılaraq yenidən müstəqil olan studiya haqqında BBC-yə verdiyi müsahibədə Schafer-dən son illərdə oyun istehsalının iqtisadi şərtlərinin dəyişib-dəyişmədiyi soruşulub. O, əvvəllər sənayedəki çətin dövrlərin ardınca yenidən işə qəbul dalğasının gəldiyini, indi isə uzun müddətdir belə bir canlanma görmədiyini bildirib.
“Düzünü desəm, oyun hazırlamağın iqtisadi tərəfini artıq başa düşmürəm. Əvvəllər işdən çıxarmalar olurdu, sonra rəhbərlər oyun hazırlamaq üçün insanlara ehtiyac duyduqlarını anlayıb yenidən işçi götürürdülər. Düşünürdüm ki, bu eniş-yoxuş davam edəcək. Amma təxminən dörd ildir vəziyyət pisdir və səbəbini bilmirəm. İnsanlar oyun oynayır, şirkətlər pul qazanır. Bəs niyə bu qədər insan işini itirir? Güman edirəm, haradasa kimsə acgözlük edir. Ümid edirəm ki, bu da keçici mərhələdir və vəziyyət düzələcək.”
Schafer-ə görə, AAA oyunlar üzərində işləyənlər daha sərt iş mühiti ilə üzləşirlər: bəzən oyun tamamlanan kimi komanda üzvləri işdən çıxarılır. Indie oyun hazırlayan studiyalarda isə başqa bir risk var. Oyun yayımlandıqdan sonra növbəti layihəni maliyyələşdirməyə pul çatmaya bilər. Bununla belə, o, yaradıcılığın yalnız indie oyunlara xas olduğu fikri ilə razılaşmır və AAA layihələrdə də güclü yaradıcı işlərin görüldüyünü deyir.
Onun sözlərinə görə, oyun sənayesində çalışan bir çox insan bu sahəni sabit iş və ya rahat həyat tərzi üçün seçməyib. Onlar oyun hazırlamaq istədikləri üçün riskləri qəbul edirlər. Schafer yaradıcı insanların işlərini itirməkdən və ailələrini necə dolandıracaqlarından narahat olmadan çalışa bildikləri bir sənaye görmək istədiyini bildirib.
Müsahibədə Double Fine-ın bağlanma ehtimalından da danışılıb. Schafer əvvəlcə studiyanı xilas etmək imkanlarının olduğunu anlamadığını, daha sonra isə mübarizə aparmaq qərarına gəldiyini söyləyib.
“Əvvəl elə düşünürdüm ki, bizim studiyanı bağlayacaqlar. Sonra başa düşdüm ki, başqa seçimlər də var. Özümüzə sual verdik: ‘Yox olmaq istəyirik?’ Xeyr, yaşamaq istəyirdik. Double Fine-ı məhv etmək həmişə çətin olub.”
Schafer studiyanın həm Thank You Bus Driver kimi kiçik indie oyunlar, həm də Psychonauts 2 kimi daha böyük layihələr hazırlaya bilməsini onun fərqli cəhəti olduğunu hesab edir. O, Double Fine-ın yaradıcı dəyərlərini qorumaq üçün mübarizə aparmağa dəyər olduğunu deyir. Studiyanın yenidən müstəliq şirkət olması 2026-cı ilin iyulunda rəsmi olaraq elan edilib.
