"Santa Monica Studio" təxminən dörd ildir davam edən səssizliyini elə bir layihə ilə pozdu ki, bunu oyunun fanatları belə təxmin edə bilməzdi. Qarşıdan gələn yeni oyun Kratosun deyil, onun illərdir gizli qalan həyat yoldaşı Feyin hekayəsi haqqında olacaq.
Hələlik rəsmi çıxış tarixi açıqlanmasa belə, yayımlanan uzun təqdimat videosu layihənin artıq ciddi inkişaf mərhələsinə çatdığını göstərdi.
Ölüm belə onu dayandıra bilmədi: Feyin böyük missiyası.
"God of War" (2018) oyununun elə ilk dəqiqələrindən etibarən Feyin ölümünün bütün hekayəni hərəkətə gətirən əsas qüvvə olduğunu görmüşdük. Yeni oyun isə bizi tam olaraq həmin anın pərdəarxasına aparır. Dünyasını dəyişən Fey özünü qəribə məxluqlarla dolu, dağılmış bir axirət dünyasında tapır. Lakin o, real dünyada qalan Kratos və Atreusun taleyindən xəbərdardır. Onları gözləyən böyük təhlükələrin qarşısını almaq üçün Fey çox çətin qərarlar verməli olacaq.
Bu mistik səyahətdə Feyə danışan sirli kosmik bir kub və Rue adlı mühafizəçi yoldaşlıq edir. İlk andan etibarən hücuma məruz qalan Feyin nümayiş etdirdiyi döyüş bacarıqları isə seriyanın o bildiyimiz amansız, aqressiv və yaxın döyüş ruhunun tam gücü ilə qorunduğunu göstərir.
Ağır zərbələrdən akrobatik sürətə: Geympley necə dəyişir?
"Santa Monica Studio" tərtibatçıları Feyin geympleyini Kratosun o tanıdığımız ağır, dağıdıcı və sümük qıran üslubundan fərqləndirmək üçün tamamilə yeni bir mexanika üzərində işləyiblər. Biz bu dəfə daha çevik və dinamik bir Müharibə İlahəsi görəcəyik:
- Hava və Yer Arasında Kəsintisiz Keçid: Fey döyüş zamanı akrobatik hərəkətlərlə yerlə hava arasında sürətli kombinasiyalar (kombolar) edə bilir.
- Maksimal Çeviklik: Reaksiya müddəti seriyanın əvvəlki oyunları ilə müqayisədə xeyli sürətləndirilib. Bu da qarşıdurmaları daha xaotik və sürətli edir.
- Mifologiyaların Sintezi: Ən maraqlı məqamlardan biri budur ki, oyun təkcə Skandinaviya mühiti ilə məhdudlaşmır; fərqli mifoloji elementləri eyni kainatda birləşdirərək daha eksperimental bir dünya təqdim edir.
İllərdir cavabsız qalan nəzəriyyələr deyəsən gerçək olacaq.
"God of War: Laufey" sadəcə yeni bir oyun deyil, həm də oyun forumlarında illərdir müzakirə edilən bəzi nəzəriyyələrin cavabıdır.
Yəqin ki, fanatlar 2018-ci ildəki oyunda dünyanın sonunu xəbər verən nəhəng ilan Yormunqandı (Jörmungandr) çağırmaq üçün o məşhur şeypuru pərdəarxasında kimin çaldığını xatırlayırlar. Ən güclü iddialar bu gizli şəxsin məhz Fey olduğu deyilirdi. Yeni təqdimat videosu onun ölüm və zaman anlayışları ilə fərqli bir bağının olduğunu göstərməklə bu nəzəriyyəni yenidən alovlandırdı. Belə görünür ki, Fey ölsə də, pərdəarxasından ailəsinə kömək etməyə davam edirmiş.
Cory Barlog-un illər əvvəlki ipucusu: Seriyanın baş rejissoru Cory Barlog hələ 2020-ci ildə verdiyi müsahibədə Feyin bu kainatdakı rolunun hər kəsdən böyük olduğunu və bir gün mütləq Kratos ilə Feyin necə tanış olduqlarından bəhs edən bir hekayəni danışmaq istədiyini qeyd etmişdi. Görünən odur ki, Barlog ağlındakı planı reallaşdırmaq üçün doğru zamanı gözləyirmiş.
"God of War" üçün tamamilə yeni bir era başlayır.
2005-ci ildə Yunan mifologiyası ilə başlayan, 2018-ci ildə Skandinaviyaya köç edən və 2022-ci ildə "Ragnarok" ilə Kratos və Atreusun hekayəsini böyük ölçüdə tamamlayan franşiza, indi tamamilə yeni bir səhifə açır.
"God of War: Laufey", haqqında çox az şey bildiyimiz bir xarakteri mərkəzə qoyaraq riskli, amma bir o qədər də cəsur bir addım atır. Əgər ipucları bizi yanıltmırsa, bu oyun seriyanın ən qaranlıq sirlərinə rəsmi cavab olacaq və bizə Kratosun kölgəsində qalmış əsl qəhrəmanı tanıdacaq.
